Акыркы макалалар

Азыркы өкмөт мүчөлөрүнүн айлыгы жана кошумча киреше булагы. Декларация

Азыркы өкмөт мүчөлөрүнүн айлыгы жана кошумча киреше булагы. Декларация

Өкмөттүн айрым мүчөлөрү жана алардын туугандары негизги жумушунан тышкары кошумча киреше булагына ээ.

Кыргызстанда 23-апрель күнү Мухаммедкалый Абылгазиев башында турган жаңы өкмөт түзүлдү. Sputnik Кыргызстан агенттиги 2016-жылга карата тапкан кирешесинин декларациясын карап чыгып, каражатты дагы кай жактан таап келгенине кызыкты.

Эскерте кетчү жагдай, Коргоо иштери боюнча мамлекеттик комитеттин төрагасы ЭРЛИС ТЕРДИКБАЕВ, юстиция министри АЙНУР АБДЫЛДАЕВА, өзгөчө кырдаалдар министри НУРБОЛОТ МИРЗАХМЕДОВ, саламаттык сактоо министри КОСМОСБЕК ЧОЛПОНБАЕВ тууралуу маалымат жок. Себеби аталган адамдар саясий кызматты ээлебегендиктен декларациясы жарыяланган эмес.

Мындан тышкары, материалга өкмөт мүчөлөрүнүн жана алардын жакындарынын мүлкү киргизилбеди. Аны менен бирге айлыкка гана жашаган туугандар кошулган жок.

КОШУМЧА КИРЕШЕ БУЛАГЫНА ЭЭ ӨКМӨТ МҮЧӨЛӨРҮ:

Азыркы премьер-министр, ал кездеги биринчи вице-премьер МУХАММЕДКАЛЫЙ АБЫЛГАЗИЕВ 2016-жылы негизги жумушунан 803 миң сом тапса, мал сатуудан 870 миң сом пайда көргөн.

Биринчи вице-премьер КУБАТБЕК БОРОНОВ (ал кезде ӨКМ жетекчиси) 730 миң сом иштеп таап, кошумча кирешеге ээ болгон эмес. Бирок анын жакын тууганы келишимдердин эсебинен 483 миң сом тапкан.

Вице-премьер ЖЕҢИШ РАЗАКОВ эки жыл мурун дал ушул кызматты аркалаган. Жылдык маянасы болгон 691 миң сомдон тышкары, 144 миң сом өлчөмүндө пенсия алган.

Өкмөттүн аппарат жетекчиси МУРАТ МУКАМБЕТОВ (2016-жылы өкмөттүн аппарат жетекчисинин биринчи орун басары) 879 миң сомдук кирешесинен тышкары каражат түшкөн эмес. Бирок анын жакын тууганы ишкерликтен 1 миллион 450 миң сом тапкан.

Өнөр жай, энергетика жана кенди пайдалануу боюнча мамлекеттик комитеттин жетекчиси УЛАН РЫСКУЛОВ (эки жыл мурун жетекчинин орун басары) жарандык-укуктук жана башка келишимдерден 470 миң сом көргөн. Ал эми негизги жумушунан жыл ичинде 511 миң сом айлык акы алган.

Финансы министри АДЫЛБЕК КАСЫМАЛИЕВ негизги жумушунан миллион сомго чукул акча алса, жакын тууганы ишкерлик менен алектенип, 1 миллион 162 миң сом пайда көргөн.

Эскерте кетсек, жакында эле мурдагы биринчи вице-премьер Аскарбек Шадиевдин мүлкү камакка алынган. Ага чейин Шадиев Кылмыш жаза кодексинин 304-беренеси (Кызматтык абалынан кыянаттык менен пайдалануу) боюнча айыпталып жатканы маалымдалган. Шадиевдин канча мал-мүлкү жана дүнүйөсү бар экени да жарыяланган.

Түп нускага шилтеме : sputnik.kg

Бир гана сайтта катталгандар пикирлерин жаза алат. Эгер катталган болсоңуз, анда аккаунтуңузга кириңиз.
катталгандар гана колдонуучулар "ЖМКларга даттанууларды териштирүү комиссиясына" арыздана алат. Эгер сиздин аккаунтуңуз бар болсо, анда кириңиз.

Азырынча бир да пикир жок...