Акыркы макалалар

АМЕРИКА ЫРЛАРЫН КОМУЗГА ТҮШҮРГӨН НЕМЕЦ КЫЗЫ

АМЕРИКА ЫРЛАРЫН КОМУЗГА ТҮШҮРГӨН НЕМЕЦ КЫЗЫ

Надя КАУТС 15 жашта. Жалал-Абад шаарында жашайт. Михаил ГЛИНКА атындагы музыкалык мектепте комуздан жана вокалдан сабак алат. Ошондой эле өз алдынча Американын ырларын комузга түшүрөт. 9 жылдан бери Кыргызстанда жашаган немец кызы Надя менен жакындан маек курдук.

-Саламатсызбы, алгач өзүңүз жөнүндө айта кетсеңиз?

-Мен Өзбекстанда 2001– жылы төрөлгөм. Ал жакта 5 жыл жашаганбыз, анан Кыргызстанга көчүп келдик. 9 жылдан бери бул жакта жашайбыз. Азыр 11-класста окуйм. Апам Швейцариядан, атам Германиядан. Ошондуктан жайында бир ай таенем менен, бир ай чоң энем менен жашап, жаңы гана келдим. Мындан кийин жыл сайын Германияга барып турам. Эки ай башка жакта жүрүп, Кыргызстанды сагынып калыпмын. Атам Германиядан болуп, немец кызы болгонум менен Кыргызстан менин үйүм болуп калды. Анткени эсимди тааныгандан бери бул жакта жашайм. Өзбекстанда жаш маалымда жашаган үчүн эстей албайм. Бирок Кыргызстанда өзбек улутундагы досторум көп. Үйүбүздө немец тилинде сүйлөшөбүз. 7-класска чейин №2 мектепте окугандыктан, өзбек тилин жакшы билем. Коңшуларыбыздын дагы көпчүлүгү өзбек эли болгондуктан, мен кыргыз тилин да, өзбек тилин да бирдей эркин сүйлөп калдым. Азыр мектепке барбайм, үйдө отуруп немец мектебинде окуйм. Мага ал жактан китептерди, окуу программаларды жөнөтүп турушат. Ошондой эле эки мугалим бар, алар мага бардык сабактардан жардам беришет.

-Кантип комуз чертип калдыңыз?

— Вокалга кызыгып шаарыбыздагы Михаил Глинки атындагы музыкалык мектепке келдим. Назира Мырзабаева эжекеден сабак ала баштадым. Бул жерден кичинекей кыздын комуз черткенин көрүп мен да кызыгып үйрөнүүнү кааладым. Мага комуз алып беришти. Өткөн жылдын февраль айынан бери комуз үйрөнүп келем. Чертип кетүү кыйын болду. Өзү колдорум узун, ошентсе да комузга жетпей, манжаларымды кеңири иштете албай убара тарттым. Ошентип жүрүп үйрөнүп кеттим. “Таң булбулу” күүсүн өзгөчө жактырып чертем. Ырлардан “Энекем”, “Ала-Тоо” деген ырларды чертип ырдайм. Американын чоң шаарларында эмес, кичинекей кыштактарында сүйүп угулчу “country music” деген ырлары болот. Мен азыр ошолорго кызыгып ырдап жатам. Алардан өзгөчө жаккан “country boy” ырынын аккордун интернеттен издеп таап, комузга түшүрүп ырдадым. Америкалык жана немец ырларын аккордун таап комузга түшүрүү үстүндө иштеп жатам. Эми жалаң гана англис тилиндеги ырларды комузга салып ырдайм. Мага Американын популярдуу ырлары жагат. Аларды көп угам жана комузга түшүрүүнү каалайм.

-Чындыгында акыркы кездерде чет элдик музыкалар комузга түшүрүлүүдө. Бирок ырга салууда өзгөчөлүк болсо керек?

-Чет элдик ырды комузга түшүрүүдө кыйынчылык болот. Бир октавада 8 үн болот го, алар комузда жок. Колду биринчи жерден жылдырыш керек ошонусу кыйыныраак. Немец ырларында бир октавадан көп болот. Кыргыз ырларында болсо 6-7 үн бар. Ырды комузга түшүргөндөн кийин эжекеме угузам, ал баасын берет.

-Интернационалист үй-бүлөдөн экенсиз, бир нече тил билсеңиз керек?

-5 тилде эркин сүйлөй алам. Алар: швейцар-немец, англис, өзбек, кыргыз жана немец тилдери. Учурда эки тилди, орус, француз тилдерин үйрөнүп жатам. Алгач биринчи жолу мектепке №1 мектеп орус тилин билбейт экен деп албай коюшкан. Анан №2 мектепте окуп калдым. Эми орус тилин түшүнүп, кыйла билип калдым.

-Бир нече өлкөлөрдө болупсуз, аларды бири-биринен эмнеси менен айырмалайт элеңиз?

— Менин мекеним Германия жана Кыргызстан. Бирок Кыргызстанда өсүп чоңойдум. Эки өлкө тууралуу айта турган болсом. Германияда баары таза, айрыкча тамак-аштары. Бирок алар чет өлкөлүктөрдү жана меймандарды анчалык жакын кабыл алышпайт. Бизде Кыргызстанда меймандарды сүйүнүп, сүйүп тозуп алышат, айрыкча чет өлкөлүктөрдү. Мисалы өзбек улутундагы досторум өтө сыйчыл болгону суктандырат.

Түп нускага шилтеме : aimak.kg

Бир гана сайтта катталгандар пикирлерин жаза алат. Эгер катталган болсоңуз, анда аккаунтуңузга кириңиз.
катталгандар гана колдонуучулар "ЖМКларга даттанууларды териштирүү комиссиясына" арыздана алат. Эгер сиздин аккаунтуңуз бар болсо, анда кириңиз.

Азырынча бир да пикир жок...