Акыркы макалалар

БАТКЕНДЕ ТӨРТ ЖЫЛДАН БЕРИ БҮТПӨГӨН МЕКТЕПТИ ЭМИ ГАНА ПАЙДАЛАНУУГА ТАПШЫРЫШАТ


БАТКЕНДЕ ТӨРТ ЖЫЛДАН БЕРИ БҮТПӨГӨН МЕКТЕПТИ ЭМИ ГАНА ПАЙДАЛАНУУГА ТАПШЫРЫШАТ

БАТКЕН. Кыргыз Өкмөтүнүн Баткен облусундагы ыйгарым укуктуу өкүлү Абиш Халмурзаев төрт жылдан бери курулушу бүтпөй келаткан Кадамжай районундагы “Сырт” орто мектебинин курулушун жаңы окуу жылына карата толук аяктоону катуу тапшырды

Баса, Сырт кыштагындагы 375 орундуу, 3 кабаттуу мектептин курулушу 2013-жылы башталып, бүгүнкү дейре толук бүтпөй турат. Курулушту бир сыйра көрүп чыккан Абиш Халмурзаев “Халил” жоопкерчилиги чектелген коомунун ишин таптакыр сапатсыз деп баалады. Курулушка керектүү каражатты алганы менен төрт жылдан бери курулушту тапшырбаган компаниянын ишин өкүл өкүртө сындап, мектепти 1-сентябрга тапшырууну курулуш компаниясына абдан катуу буюрду. Аталган мектепти окуу эмеректери менен камсыз кылууну

жана мектептин айланасын көрктөндүрүүнү колго алган “Альфа Интернейшнал” компаниясынын иши дагы көңүл жылытаарлык эмес! – деп тызылдады Кыргыз Өкмөтүнүн Баткен облусундагы ыйгарым укуктуу өкүлү Абиш Халмурзаев. – Анткени, окуу парталары дагы колдонууга өтө эле ыңгайсыз жасалыптыр.

Айтмакчы, буга дейре Кадамжай районунун Сырт айылындагы эски мектеп жер титирөөдөн улам кыйрап, өзгөчө кырдаалдар министрлиги аны таптакыр жараксыз деп тапкан. Мындан улам балдарынын коопсуздугунан кабатырланган айыл эли дагы жаңы мектептин ачылышын чыдамсыздык менен күтүп жаткандыктарын айтышты.

Алишер ТОКСОНБАЕВ, өз кабарчыбыз

Түп нускага шилтеме : aimak.kg

Бир гана сайтта катталгандар пикирлерин жаза алат. Эгер катталган болсоңуз, анда аккаунтуңузга кириңиз.
катталгандар гана колдонуучулар "ЖМКларга даттанууларды териштирүү комиссиясына" арыздана алат. Эгер сиздин аккаунтуңуз бар болсо, анда кириңиз.

Азырынча бир да пикир жок...